कुलुपबंद शहर
त्या कुलुपबंद शहराने
एक खोलवर उसासा टाकला
आणि परत एकदा ते
चिडिचुप्प गल्लीबोळात
जाऊन बसलं.
मध्यंतरी चर्चा होती शहरात
रात्रीच्या बेधुंदीची
रंगणार होती रात्रीची जिंदगी
आणि चढणार होती शहराला
नवी जवानी.
पण आजकाल कसा काय
शहरात ऐकू येतोय
हमरस्त्यावरचा फक्त सायरन
शववाहिका की रुग्णवाहिका
हेही आताशा कळत नाही
कारण गल्लीतले कुत्रे
कधीच विसरलेत रडणं
आणि माणसं तर
दबकलेलीच.
रिकामे हात आणि
रिकाम्या शाळा
सृजनाच्या वाटाच बंद करुन
भकाळी पोट आणि
कोरड्या डोळ्यांनी
आला दिवस कसाबसा जगत
गपगार पडलेली माणसं.
शांत तटस्थ माझं शहर
बघतय बंदीवासातली
ही पडझड
आणि माणसं उठतील,
मोट बांधतील
उरल्या सुरल्या आकांक्षांची,
करतील धडपड
कधीना कधी सुरळीत जगण्याची
या एकाच आशेवर
बसलय ते कुलुपबंद होऊन!!
सिरत सातपुते
२८ जुलै २०२०
For this unfortunate event human himself is responsible and for a change mansala ani gajbajlelya shahrala kulup Banda Karun nisarga mokla shwas ghetay ani itar hi sajeev hya srujanshil srushti Che part ahet hyachi janiv manvala Karun detay.
ReplyDelete