जथ्था बनून चालतेय...
तो एक जथ्था
रस्ताभर चाललेला
बाई बाप्या मुलं
भूक तहान थकवा
सगळं एकवटलेला
एक एक पाऊल टाकणारा
त्या एका जथ्थ्याबरोबर
मागे पुढेही तसाच जथ्था
तोच तो सारखेपणा
तीच ती थीजलेली नजर
थकलेली तीच पावलं
आणि वेदनाही तीच ती
तोही एक त्यातलाच
नजरेसमोर फक्त
घर आणि वावर
म्हातारा आणि म्हातारी
शेळी आणि कोंबडी
एकच आस त्यांना भेटण्याची
त्याच्यामागे तिचीही चाल
नजर तीच, तीच ओढ
खाली मान पण
काळजात ध्यास
सावरायचाय हिशोब
मांडायचाय नवा डाव
हरलेला तो, त्याच्यामागे तिचं लटांबर
कोवळ्या चालीची बकोटीला फरपट
हातातून सुटणारा थकलेला जीव
कडेवर तान्हा, रिकामा पान्हा
डोक्यावर किडुकमिडुक
सुकलेले डोळे आणि भकाळी पोट
नजरेपल्याड मुक्कामावर
त्याची तयारी, शेवटाची
तिची हिंमत, उभारायची
सावडायचय तिला जगणं
घरासाठी आणि त्याच्यासाठी
म्हणून जथ्था बनून चालतेय...
म्हणून जथ्था बनून चालतेय...
सिरत सातपुते
३० मे २०२०
No comments:
Post a Comment